Талдықорғандағы Оқушылар сарайында «National Geographic-тің» ең үздік 50 суреті» тақырыбында ашылған фотокөрме одан әрі жалғасуда.

Алматы облыстық Туризм басқармасының қолдауымен өтіп жатқан көрмеге келушілер әйгілі «Ауған қызының» суретінен бастап, 10 000 ваттық жарықтың көмегімен 4022 метр тереңдікте түсірілген Титаник кемесінің суретін де көре алады. Сондай-ақ, онда «National Geographic» тарихына нәзіктік пен тазалықтың, дәлдік пен адалдықтың символы ретінде енген сан алуан мазмұндағы басқа да фототуындылар қойылған.

«Әлемді шарлаған мұндай көрменің Талдықорғанда ашылуы біз үшін үлкен мәртебе, – деді талдықорғандық журналист Жұмахмет Жайлаубаев, – расында да мұндағы әрбір фото адамға терең ой салып қана қоймай, қоршаған ортаға философиялық көзқараспен қарауға үндейді».

Аймақтық дамыту бөлімінің кеңесшісі Дидар Диханбаевтың айтуынша, бір айға жоспарланған көрмені бүгінге дейін мыңдаған адам тамашалап үлгерген. Көрме 10 қыркүйекке дейін жалғасады.

Естеріңізге сала кетейік, «National Geographic Қазақстан» журналы алғаш рет елімізде 2016 жылдың ақпан айынан бастап жарыққа шығып келеді. Қазіргі күні беделді басылымның ана тіліміздегі он сегізінші саны оқырмандар қолына тиіп отыр.

Фото: Ерболат Шадрахов, Екпін Хасенжан